2.1K ប្រាសាទភ្នំខ្យង
ប្រាសាទភ្នំខ្យង មានទីតាំងស្ថិតនៅលើភ្នំខ្យង ក្នុងភូមិភ្នំខ្យង ឃុំប្រាសាទភ្នំខ្យង ភាគខាងជើងទីរួមស្រុកកំពង់ត្រាចចម្ងាយ ៩គីឡូម៉ែត្រ ក្នុងខេត្តកំពត។ ប្រាសាទភ្នំខ្យងស្ថិតក្នុងរូងជម្រៅប្រមាណជាង៦ម៉ែត្រពីកំពូលភ្នំដោយត្រូវឆ្លងកាត់មាត់ច្រកតូចៗ មានជណ្តើរឥដ្ឋជាថ្នាក់ៗ។ មនុស្សភាគតិចណាស់ដែលបានស្គាល់ និងមកលំហែកម្សាន្តនៅប្រាសាទភ្នំខ្យងព្រោះតែការផ្សព្វផ្សាយមិនមានភាពទូលំទូលាយដូចបណ្តាមណ្ឌលកម្សាន្ត ឬទីតាំងប្រវត្តិសាស្ត្រនានា។ ម្យ៉ាងទៀតប្រាសាទនេះមានទីតាំងនៅកណ្តាលកូនភ្នំស្ថិតក្នុងចន្លោះរូងតូចចង្អៀត ពោលគឺបើមិនមានអ្នកនាំផ្លូវទេនោះមិនអាចរកឃើញឡើយ ព្រោះតែហាក់ស្ថិតក្នុងទីអាថ៌កំបាំងបែបនេះ ក្នុងមួយខែៗភ្ញៀវច្រើនបំផុតមានត្រឹមពី២០នាក់ ទៅ៣០នាក់តែប៉ុណ្ណោះ។
សម្រាប់អ្នកស្រុកបានចាត់ទុកប្រាសាទភ្នំខ្យងជាទីសក្ការៈដ៏ស័ក្តិសិទ្ធិសម្រាប់ការបន់ស្រន់ប៉ងប្រាថ្នាអ្វីមួយតាមផ្លូវសុចរិត។ ជារៀងរាល់ឆ្នាំ អ្នកស្រុកតែងតែសហការណ៍ជាមួយអាជ្ញាធរមូលដ្ឋានធ្វើពិធីបង្សុកូលឧទ្ធិសកុសលជូនដល់ញាតិសន្តានទាំងឡាយដែលបានចែកឋានដោយពុំដែលអាក់ខានឡើយ។
ប្រាសាទនេះសាងសង់នាអំឡុងសតវត្សទី៦ ដើមសតវត្សទី៧ នៃគ្រិស្តសរាជ ពោលគឺស្ថិតក្នុងអន្តរកាលរវាងសម័យវប្បធម៌នគរភ្នំ និងចេនឡា។ ដោយបែរមុខទៅទិសខាងលិចប្រាសាទភ្នំខ្យងមានលក្ខណៈស្រដៀងទៅនឹងប្រាសាទអាស្រមមហាឥសីនៅភ្នំដាខេត្តតាកែវ និងអាស្រមមហាឥសីនៅភ្នំហាន់ជ័យខេត្តកំពង់ចាម។ នៅកណ្តាលនៃតួប្រាសាទមានសិវលិង្គធម្មជាតិមួយដុះចេញពីបាតភ្នំ។ វត្តមានរបស់លិង្គថ្មធម្មជាតិនេះតាមជំនឿរបស់អ្នកស្រុកគឺធើ្វឱ្យប្រាសាទនេះមានភាពស័ក្តិសិទ្ធិបំផុត។
