ការជិះម៉ូតូដើរលេងនៅខេត្តកំពត គឺជាមធ្យោបាយធ្វើដំណើរកម្សាន្តដ៏ពេញនិយមមួយតាមបណ្តារមណីយដ្ឋាននានា និងទាក់ទាញសម្រាប់ភ្ញៀវទេសចរជាតិ និងអន្តរជាតិ។ 

បន្ទាប់ពីធ្វើដំណើរមកដល់ខេត្តកំពត លោកអ្នកអាចជួលម៉ូតូជិះកម្សាន្តលេងនៅតាមកន្លែងកម្សាន្តនានា​ ជាពិសេសគឺជិះទៅលេងភ្នំបូកគោ ព្រោះនៅពេលដែលយើងធ្វើដំណើរតាមផ្លូវទៅលើភ្នំនោះ យើងនឹងទទួលបាននូវភាពស្រស់ស្រាយប្លែកអារម្មណ៍ដែលមិនធ្លាប់មានពីមុនមក។ យើងអាចរីករាយនឹងការស្រូបយកខ្យល់អាកាសបរិសុទ្ធជាមួយធម្មជាតិដ៏ស្រស់បំព្រង។ 

អ្វីដែលពិសេសជាងនេះទៅទៀតនោះ គឺនៅពេលឡើងជិតដល់រូបសំណាកលោកយាយម៉ៅ លោកអ្នកនឹងឃើញអ័ព្ទអណ្តែតនៅពាសពេញដងផ្លូវ ហើរមកប៉ះនឹងខ្លួនយើង ប្រៀបដូចជាយើងកំពុងតែស្ថិតនៅក្នុងបន្ទប់ម៉ាស៊ីនត្រជាក់អីចឹង។ នៅទីនោះមានកន្លែងកំសាន្តជាច្រើនទៀតដូចជា៖ ទឹកធ្លាក់ពពកវិល សួនបន្លែ កាស៊ីណូចាស់ វិហារកាតូលិក វាលស្រែ១០០ វាលស្រែ៥០០ វត្តសំពៅប្រាំ ទំនប់ទឹក ដំណាក់ស្លាខ្មៅ និងកន្លែងផ្សេងៗមួយចំនួនទៀត។

ចំពោះការជិះម៉ូតូក្នុងក្រុងវិញ លោកអ្នកអាចធ្វើដំណើរទៅគ្រប់ទីកន្លែង និងគ្រប់ពេលវេលា។​ ពេលព្រឹកព្រលឹមយើងអាចជិះទៅទិញគ្រឿងសមុទ្រស្រស់ៗនៅផែកំពង់កណ្តាល រួចបន្តដំណើរតាមទីជនបទ ព្រៃភ្នំ​ តំបន់មាត់សមុទ្រ ដងព្រែកកំពត​ និងតាមរមណីយដ្ឋានប្រវត្តិសាស្ត្រផ្សេងៗទៀត។​ 

ពេលល្ងាចយើងអាចជិះម៉ូតូលំហែកាយតាមមាត់ព្រែកកំពត រកកន្លែងញុាំអាហារឆ្ងាញ់ៗ និងជិះទៅលេងកោះស្មៅ​ ស្រែអំបិល ថតរូបស្អាតៗទុកជាអនុស្សាវរីយ៍។

ដើម្បីអាចជួលម៉ូតូបាន តម្រូវឲ្យលោកអ្នកមានអត្តសញ្ញាណប័ណ្ណមួយសន្លឹក។ 

ស្វែងរកហាងជួលម៉ូតូ៖ 

• ធីតាជួលម៉ូតូ 
• រេដប៊ុលធួរ

ជាមួយគ្នានេះដែរ យើងខ្ញុំក៏មានមគ្គទេសក៍ទេសចរណ៍ដើម្បីរៀបចំសកម្មភាពកម្សាន្តតាមរយៈការជិះម៉ូតូនេះផងដែរ។ ក្នុងដំណើរកម្សាន្តនេះ​ យើងខ្ញុំនឹងផ្តល់ជូនមធ្យោបាយធ្វើដំណើរ និងមគ្គទេសក៍ទេសចរណ៍ដែលមានបទពិសោធន៍យូរឆ្នាំ និងអាចប្រើប្រាស់ភាសាអង់គ្លេសបាន។