35.4K ណូរីភ្នំវល្លិ៍
ពីមុនធ្លាប់តែឮគេជិះណូរីនៅបាត់ដំបងមែនទេ? ឥឡូវនេះនៅកំពតក៏មានសេវាកម្មជិះណូរីផងដែរ ដែលភ្ញៀវទេសចរអាចរកបាននៅ រមណីយដ្ឋាន ឋានសួគ៌ធម្មជាតិភ្នំវល្លិ៍ ដែលមានទីតាំងព័ទ្ធជុំវិញដោយជួរភ្នំ លើទឹកដីភូមិត្រពាំងព្រីងខាងជើង ឃុំត្រពាំងព្រីង ស្រុកទឹកឈូ ខេត្តកំពត ជិតព្រំប្រទល់ខេត្តកែប ដោយយើងត្រូវធ្វើដំណើរចេញពីក្រុងកំពតទិសដៅទៅកាន់ខេត្តកែបតាមបណ្តោយផ្លូវជាតិលេខ ៣៣ រហូតហួសវិទ្យាល័យ ហ៊ុនសែន ចំការដូង បន្តិច យើងត្រូវបត់ឆ្វេង រួចធ្វើដំណើរបន្តតាមផ្លូវគ្រួសក្រហមប្រហែល ១១គីឡូម៉ែត្រទៀត នោះយើងនឹងបានទៅដល់ទីតាំងផ្ទាល់តែម្តង។
រមណីយដ្ឋានបែបធម្មជាតិមួយកន្លែងនេះមានលក្ខណៈជាចម្ការ ជាសួនកម្សាន្តដ៏ស្រស់បំព្រង និងមានជាភោជនីយដ្ឋានផងដែរ។ ជាពិសេសនៅទីនោះក៏មានសេវាកម្មជិះណូរីនៅលើផ្លូវដែកដែលមានប្រវែងជាង ៣គីឡូម៉ែត្រលើផ្ទៃដីរាប់សិបហិកតា បើកចាប់ពីម៉ោង ៨ព្រឹកដល់ម៉ោង ៥ល្ងាច ។
.jpg)
តាមរយៈការជិះណូរីនេះ ភ្ញៀវទេសចរអាចអង្គុយស្រូបយកខ្យល់អាកាស និងគយគន់ដំណាំមួយចំនួនដែលដាំនៅអមសងខាងផ្លូវដូចជា ចម្ការស្វាយចន្ទី កន្លែងដាំបន្លែសរីរាង្គ និងចម្ការដូងប្រេងផងដែរ។ ក្រៅពីនេះ យើងក៏អាចទស្សនាសត្វចិញ្ចឹមដូចជា សត្វជ្រូកព្រៃ សេះ គោ ក្ងោក និងសត្វពពែជាដើម។
រីឯទីធ្លានៅទីនោះវិញមានសភាពធំទូលាយ បរិយាកាសបែបស្ងប់ស្ងាត់ និងមានប្លង់ស្អាតៗបែបធម្មជាតិសម្រាប់ថតរូប ពិតជាមិនធ្វើអោយភ្ញៀវទេសចរខកបំណងឡើយ។
អត្ថបទដោយ៖ ដែង សុជាតា
សម្រាប់ភ្ញៀវម្នាក់
$1.25
សម្រាប់ក្មេងក្រោមអាយុ 10ឆ្នាំ
$0.00
