ព្រះរាជដំណាក់ព្រះបាទមុនីវង្ស ឬដំណាក់ស្ដេច គឺជាសំណង់អគារដ៏មានវ័យចំណាស់មួយក្នុងចំណោមអគារដទៃទៀតដែលបន្សល់ទុកតាំងពីសម័យអាណានិគមនិយមបារាំងមកម្ល៉េះ ដែលបច្ចុប្បន្នត្រូវបានជួសជុលឡើងវិញដោយក្រុមហ៊ុនឯកជន។ តាមរយៈចំណារប្រវត្តិសាស្រ្តបានបង្ហាញថានៅក្នុងឆ្នាំ 1917 ភ្នំបូកគោត្រូវបានរកឃើញដោយជនជាតិបារាំង រួចត្រូវបានអភិវឌ្ឍឱ្យទៅជារមណីយដ្ឋាននៅឆ្នាំ 1921 នារជ្ជកាលព្រះបាទស៊ីសុវត្ថិសម្រាប់ជាទីកន្លែងកម្សាន្តដ៏ល្បីល្បាញនៃអភិជនបារាំង​ និងរាជវង្សានុវង្ស ដោយបានសាងសង់ជាសំណង់អគារជាច្រើនកន្លែងនៅលើភ្នំ។ ក្នុងនោះដែរក៏មានព្រះរាជដំណាក់របស់ព្រះបាទមុនីវង្សផងដែរដោយបាន​ដាក់​ឈ្មោះ​ជា​ភាសាបារាំង​ធំ​ៗ​ថា RESIDENCE DE S.M. MONIVONG ដែលជាទីសម្រាកកម្សាន្តពីអាកាសធាតុក្តៅនារាជធានីភ្នំពេញ។ 

នៅក្នុងពេលដែលប្រទេសទទួលការឈ្លានពានពីសំណាក់បរទេស ព្រះ​រាជ​សុខភាពរបស់​ព្រះបាទ​ស៊ីសុវត្ថិមុនីវង្សមានសភាព​ទ្រុឌ​ទ្រោម ទើបទ្រង់​សព្វព្រះរាជហឬទ័យ​សម្រាក​ពី​ព្រះរាជកិច្ច និង​យាង​ទៅ​កាន់​ព្រះរាជដំណាក់​នៅ​លើ​ភ្នំបូកគោ​នៅ​ចុង​ឆ្នាំ​១៩៤១ និង​បាន​សោយទិវង្គត​នៅ​ទីនោះ​ក្នុងព្រះជន្មាយុ ៦៦វស្សានៃ​ឆ្នាំ​តែ​មួយ។ បន្ទាប់​ពី​ទ្រង់​សោយ​ទិវង្គត​ទៅ​ ​​រាជការ​បាន​កែ​ប្រែ​ព្រះរាជដំណាក់នេះទៅ​ជា​អគារ​សាលា​ក្រុង​បូក​គោវិញ។ ចំណែកឯភ្នំបូកគោបានដាក់ឈ្មោះជាឧទ្យានជាតិព្រះមុនីវង្សវិញនៅឆ្នាំ១៩៩៣ ដោយសារវាជាទីដែលទ្រង់ចូលចិត្តទៅកម្សាន្ត និងបានកសាងស្នាដៃជាច្រើននៅទីនោះ។

ព្រះរាជដំណាក់នេះស្ថិតនៅលើកំពូលភ្នំដែលមានកំពស់ ១០៧៥ម៉ែត្រសង់ឡើងនៅក្បែរមាត់ជ្រោះ មានអាកាសធាតុត្រជាក់បង្គួរ អាចគយគន់សម្រស់ព្រៃភ្នំពណ៌បៃតងដាច់កន្ទុយភ្នែក រុក្ខជាតិរីកស្រស់គ្រប់រដូវ និងអាចគយគន់ព្រះអាទិត្យរះរៀងរាល់ព្រឹកថែមទៀត។ ដំណាក់នេះមានទំហំធំដោយមានបន្ទប់ផ្ទុំ ចង្រ្កានបាយ និងកន្លែងលម្ហែដាច់ដោយឡែកពីគ្នាក៏ដូចជាមានសំណង់បាក់បែកមួយកន្លែងដែលអាចជាភោជនីយដ្ឋាន និងសំណង់បណ្ណាល័យនៅជិតច្រកចូលផងដែរ។ ដំណាក់ព្រះបាទមុនីវង្សស្ថិតនៅចម្ងាយប្រមាណ 2គីឡូម៉ែត្រពីរមណីយដ្ឋានឋានសួគ៌បូកគោ ខេត្តកំពត។ ​ភ្ញៀវទេសចរណ៍អាចទៅទស្សនាបានដោយផ្លូវធ្វើដំណើរមានលក្ខណៈងាយស្រួលមិនមានការលំបាកឡើយ។

អត្ថបទដោយ៖ សំណាង សុខអារីយ៉ា