18.7K ភូមិក្តាត
"ភូមិក្តាត" មានទីតាំងស្ថិតនៅតាមបណ្ដោយផ្លូវជាតិលេខ៣ ផ្លូវកំពតវាលរិញ ស្ថិតក្នុងឃុំព្រែកត្នោត ស្រុកទឹកឈូ ខេត្តកំពត និងមានចម្ងាយប្រមាណជា ២៣គីឡូម៉ែត្រពីទីរួមខេត្ត។ ភូមិនេះគឺជាទីកន្លែងមួយដែលមានសក្តានុពលដ៏ច្រើនសំបូរបែប នេះក៏ដោយសារតែភូមិនេះស្ថិតនៅក្បែរសមុទ្រ មានទេសភាពភ្នំ និងទឹកធ្លាក់ដ៏ស្រស់ស្អាត រួមទាំងគ្រឿងសមុទ្រស្រស់ៗថែមទៀតផង។ ភូមិនេះគឺមានទីតាំងអំណោយផលល្អមែនទែន ដោយស្ថិតនៅតាមបណ្តោយជួរភ្នំបូកគោដែលវាបានទាក់ទាញចិត្តភ្ញៀវទេសចរជាច្រើនទៅលេងទីនោះជារៀងរាល់សប្តាហ៍។ វាពិតជាកន្លែងទេសចរណ៍ដ៏ស្រស់ស្រាយមែនទែន ហ៊ុមព័ទ្ធដោយព្រៃព្រឹក្សាដ៏ខៀវស្រងាត់ ជិះទូកលេងកម្សាន្តតាមដងព្រែក និងគយគន់មើលថ្ងៃលិចយ៉ាងរ៉ូមែនទិកនៅមាត់សមុទ្រ។ យើងខ្ញុំក៏សូមណែនាំកន្លែងមួយចំនួននៅក្នុងភូមិនេះ ដើម្បីអោយបងប្អូនមានភាពងាយស្រួលក្នុងការស្វែងរកកន្លែងកំសាន្ត ៖
កន្លែងទី១ : "ក្តាតឡាតង់" ទីនេះគឺជាទីស្នាក់មួយដែលអាចអោយបងប្អូនទទួលបាននូវបទពិសោធន៍ថ្មីជាមួយនឹងការគេងបោះតង់ ចាំមើលថ្ងៃរះ និងថ្ងៃលិចនៅមាត់សមុទ្រ ការដើរចាប់ក្ដាមបង្គានៅពេលយប់ ហើយអាចមើលឃើញកោះត្រល់ មិនត្រឹមតែប៉ុណ្ណោះ យើងនឹងបានភ្លក់រសជាតិគ្រឿងសមុទ្រស្រស់ៗជាមួយនឹងទេសភាពស្ងប់ស្ងាត់ បរិយាកាសធម្មជាតិ ធានាថាអ្នកទាំងអស់គ្នានឹងស្លង់អារម្មណ៍នឹងក្តាតឡាតង់ជាមិនខាន។
កន្លែងទី២ : "ក្តាតសាណាកា" ទីនេះគឺជាកន្លែងស្នាក់ បើសិនបងប្អូនចូលចិត្តកន្លែងបែបធម្មជាតិ មានព្រៃកោងកាងសម្រាប់ទស្សនា ខ្យល់អាកាសបរិសុទ្ធ ម្ហូបអាហារគ្រឿងសមុទ្រ ការបោះតង់ និងការជិះទូកកាយ៉ាកតាមដងព្រែក បងប្អូនអាចមកក្តាតសាណាកានៅកំពតដឹងតែត្រូវចិត្តម៉ង។ ក្តាតសាណាកាមិនឆ្ងាយពីក្រុងកំពតទេ ចំងាយប្រហែល២០គីឡូម៉ែត្រពីក្រុងកំពត ស្ថិតនៅក្នុងភូមិក្តាត ស្រុកទឹកឈូ ខេត្តកំពត។
កន្លែងទី៣ : "ម្លប់ដូងជំនោរព្រែកក្តាត" ជាកន្លែងស្នាក់ និងមានអាហារដ្ឋានគ្រឿងសមុទ្រ ដែលមានទីតាំងស្ថិតនៅផ្លូវជាតិលេខ3 ចន្លោះកំពត-កំពង់សោម ក្នុងភូមិក្តាតខាងលិចចំងាយ20គីឡូម៉ែតពីទីរួមខេត្តកំពត។ ទីនេះជាកន្លែងមួយដែលសមស្របសម្រាប់អ្នកដែលចូលចិត្តបរិយាកាសក្បែរសមុទ្របែបធម្មជាតិ មានកញ្ចុះក្បែរមាត់ទឹក កន្លែងបោះតង់ ស្ពានចូលសមុទ្រ និងជិះទូកកាយ៉ាកក្នុងសមុទ្រផងដែរ។
កន្លែងទី៤ : "ព្រែកក្តាតអេកូរីស៊ត" ក៏ជាកន្លែងស្នាក់ដូចកន្លែងដ៏ទៃទៀតដែរ ដែលអាចអោយបងប្អូនទទួលយកបទពិសោធន៍នៃការគេងតង់ក្បែរជើងភ្នំបូកគោ ជិះទូកតាមដៃព្រែកទៅសមុទ្រ ភ្លក់រសជាតិអាហារគ្រឿងសមុទ្រ ព្រមទាំងសកម្មភាពដើរទៅកាន់អន្លង់ទឹកនៅក្បែរនោះផងដែរ។ បងប្អូននឹងស្លង់អារម្មណ៍ជាមួយកន្លែងមួយនេះមិនខានពេលដែលបានមកដល់។
