មិនបាច់ពិបាកគិតច្រើន មករីករាយជាមួយសកម្មភាពកម្សាន្តដ៏គួរអោយចាប់អារម្មណ៍ទាំង ១១ប្រភេទ ដែលអ្នកទាំងអស់គ្នាគួរតែសាកល្បង ពេលមកលេងខេត្តកំពត។

1. ជិះទូកមើលអំពិលអំពែក

ជាសកម្មភាពកម្សាន្តដ៏ពេញនិយមបំផុតនៅតាមដងព្រែកកំពត។ ជាទូទៅ គេជិះទូកមើលអំពិលអំពែកនៅពេលល្ងាច និងពេលយប់។ តាមរយៈការជិះទូក អ្នកទាំងអស់គ្នាអាចគយគន់ទេសភាពតាមមាត់ព្រែក ញុំាអាហារលើទូក មើលថ្ងៃលិច និងមើលសត្វអំពិលអំពែកជាដើម។ 

លម្អិត៖ https://www.visitkampot.info/385/sunset-boat-tour

2. ជិះម៉ូតូកង់បួន

ធ្លាប់ជិះម៉ូតូកង់បួនអត់? បើមិនធ្លាប់ទេ អ្នកទាំងអស់គ្នាគួរតែសាកល្បងជិះអោយបានម្តង ព្រោះជាសកម្មភាពកម្សាន្តដ៏ប្លែកអារម្មណ៍មួយ។ គេនិយមជិះម៉ូតូកង់បួនតាមជើងភ្នំនៅតំបន់វាលពួច ជិះកាត់ភក់ ទស្សនាព្រៃភ្នំ និងថតរូបលេងជាក្រុម។ 

លម្អិត៖ https://www.visitkampot.info/353/quad-biking

3. ជិះណូរី

តោះមកជិះណូរីលេង ដឹងតែប្លែកអារម្មណ៍ហ្មង! ណូរីនេះគេជិះនៅលើផ្លូវដែកដែលមានប្រវែងជាង ៣គីឡូម៉ែត្រ កាត់តាមចម្ការ កន្លែងដាំបន្លែសេរីរាង្គ និងកសិដ្ឋានចិញ្ចឹមសត្វជាដើម។ សាកស្រមៃមើលថាស្រស់ស្រាយប៉ុណ្ណា?

លម្អិត៖ https://www.visitkampot.info/530/ណូរីភ្នំវល្លិ៍

4. ជិះរថភ្លើង

ចុងសប្តាហ៍ ណាត់គ្នាជិះរថភ្លើងលេងហី? បានទាំងជិះរថភ្លើង បានទាំងមើលទេសភាពតាមផ្លូវ​ ឃើញជួរភ្នំខ្ពស់ទាប វាលស្រែពណ៌ខៀវស្រងាត់នារដូវដកស្ទូង និងពណ៌លឿងទុំនារដូវច្រូតកាត់។​ នេះជាពេលវេលាមួយដែលយើងអាចសម្រាកខួរក្បាល និងលំហែអារម្មណ៍។

លម្អិត៖ https://www.visitkampot.info/87/train

5. ជិះម៉ូតូឡើងភ្នំបូកគោ

ធុញថប់មែនទេ? តោះ! បបួលគ្នាជិះម៉ូតូឡើងភ្នំ ដឹងតាស៎ស្រស់ស្រាយហ្មង! នេះជាសកម្មភាពកម្សាន្តដ៏ពេញនិយមមួយក្នុងខេត្តកំពត។ ការជិះម៉ូតូ ល្អសម្រាប់អ្នកចូលចិត្តថតរូបតាមផ្លូវ ឃើញទីតាំងណាស្អាត អាចឈប់បានភ្លាមៗ ស្រួលថតរូបលេង។ 

ជួលម៉ូតូ៖ https://www.visitkampot.info/386/motorcycling-in-kampot

6. ជិះទូកកៃយ៉ាក

ជាសកម្មភាពកម្សាន្តដ៏ពេញនិយមមួយនៅតាមបណ្តោយដៃព្រែក។ យើងអាចជិះទូកគយគន់ទេសភាពដើមចាកដុះនៅសងខាង ស្រូបខ្យល់អាកាសដ៏បរិសុទ្ធ និងថតរូបលេងយ៉ាងសប្បាយរីករាយ។ 

លម្អិត៖ https://www.visitkampot.info/406/kayak-boat

7. ជិះស្គីតោងខ្លែង

ជាកីឡាដ៏កម្រមួយប្រភេទនៅប្រទេសកម្ពុជាយើង ហើយភាគច្រើនមានតែនៅតាមតំបន់សមុទ្រ ឬទន្លេតែប៉ុណ្ណោះ។ អ្នកទាំងអស់គ្នាអាចសាកល្បងបាននៅចន្លោះខែធ្នូ ដល់ ខែកុម្ភៈ ដែលជាខែមានខ្យល់ខ្លាំង អំណោយផលដល់ការលេងកីឡានេះ។

លម្អិត៖ https://www.visitkampot.info/99/kiteboarding

8. បាញ់ធ្នូ

ការកម្សាន្តមួយនេះបានជួយដល់ការផ្ចង់អារម្មណ៍របស់យើងអោយកាន់តែល្អប្រសើរ កាត់បន្ថយភាពស្មុគស្មាញ ទទួលបានបទពិសោធន៍ថ្មី ហើយក៏ជាការសាកល្បងថ្វីដៃសម្រាប់ខ្លួនឯងដូចគ្នា។

លម្អិត៖ https://www.visitkampot.info/674/archery

9. ជិះខ្សែរ៉ក

សម្រាប់អ្នកចូលចិត្តសាកល្បងសកម្មភាពកម្សាន្តដ៏ប្លែក អាចសាកជាមួយនឹងការជិះខ្សែរ៉កបាន។ អ្នកទាំងអស់គ្នាអាចជិះខ្សែរ៉កឆ្លងកាត់ដងព្រែកក៏បាន រឺជិះខ្សែរ៉កឆ្លងកាត់ព្រៃក៏បាន។ 

លម្អិត៖ https://www.visitkampot.info/384/rope-riding

10. ឡើងភ្នំថ្ម

តាមរយៈកីឡាបែបផ្សងព្រេងនេះ ភ្ញៀវទេសចរអាចទទួលបានបទពិសោធន៍ថ្មីជាមួយនឹងការទស្សនាទិដ្ឋភាពស្អាតៗដ៏កម្របានឃើញដូចជា ថ្មដុះ ថ្មសើម ថ្មរូបសត្វ វល្លិ៍ធម្មជាតិដែលដុះចាក់ឬសពីលើកំពូលភ្នំចុះមកដី និងមានសំណង់ប្រាសាទបាក់បែកខ្លះៗផងដែរ។

លម្អិត៖ https://www.visitkampot.info/519/rock-climbing

11. ជិះម៉ូតូទឹក

ជិះម៉ូតូ ជិះកង់ ធ្លាប់អស់ហើយ ចុះម៉ូតូទឹកវិញ ធ្លាប់ជិះនៅ? ការជិះម៉ូតូទឹកគឺជាសកម្មភាពកម្សាន្តដ៏ថ្មីប្លែកអារម្មណ៍មួយ ដែលអ្នកទាំងអស់គ្នាគួរតែសាកល្បង។ យើងអាចជិះលេងកម្សាន្ដបែបលំហែកាយ គយគន់ទេសភាពនៅតាមដងព្រែក ធ្វើឲ្យមានអារម្មណ៍ស្រស់ស្រាយ និងជួយកាត់បន្ថយភាពហត់នឿយ។

លម្អិត៖ https://www.visitkampot.info/117/riding-a-jet-ski

អត្ថបទដោយ៖ ដែង សុជាតា