ឧទ្យានជាតិព្រះមុនីវង្សបូកគោ ជាគោលដៅទេសចរណ៍ដ៏ពេញនិយមមួយកន្លែងក្នុងខេត្តកំពត។ នៅលើភ្នំនេះមានទីតាំងដ៏គួរអោយចាប់អារម្មណ៍ជាច្រើនដែលយើងគួរតែទស្សនា មានទាំងធម្មជាតិ ទឹកជ្រោះ បឹងលើភ្នំ សំណង់អគារសម័យបារាំង និងទីតាំងទេសចរណ៍ជាច្រើនទៀត។ ខាងក្រោមនេះគឺជា13 កន្លែងដែលអ្នកគួរទស្សនាពេលទៅលេងនៅភ្នំបូកគោ៖

1. កាស៊ីណូចាស់

កាស៊ីណូចាស់ ឬ Le Bokor Palace ជាសំណង់អាគារប្រវត្តិសាស្រ្ត ដែលត្រូវបានសាងសង់ឡើងនៅសម័យក្រោមអាណានិគមនិយមបារាំង។ បច្ចុប្បន្ន អាគារមួយនេះកំពុងតែទទួលការអភិរក្ស និងកែលម្អសារជាថ្មី ដើម្បីលើកសោភ័ណ្ឌភាពអោយកាន់តែស្រស់ស្អាតក្នុងរយៈពេលយូរអង្វែង។

2. វត្តសំពៅប្រាំ

វត្តសំពៅប្រាំ គឺជាវត្តអារាមដែលស្ថិតនៅលើកំពូលភ្នំបូកគោ ត្រូវបានសាងសង់ឡើងក្នុងគ.ស១៩២៤។ នៅទីនេះ យើងអាចឃើញថ្មធំៗចំនួន ៥ដុំ ដែលមានរូបរាងប្រៀបដូចនឹងសំពៅ។ បើយើងឈរមើលមកខាងក្រោម យើងនឹងបានឃើញទេសភាពដ៏ស្រស់ស្អាត ជាពិសេសរុក្ខជាតិតូចធំដុះហូរហែពណ៌ខៀវស្រងាត់។

3. ព្រះវិហារកាតូលិកចាស់

ព្រះវិហារកាតូលិកចាស់ ត្រូវបានសាងសង់ឡើងក្នុងកំឡុងឆ្នាំ១៩២០។ សព្វថ្ងៃទីនេះទទួលបានការចាប់អារម្មណ៍យ៉ាងខ្លាំងពីភ្ញៀវទេសចរដែលទៅលេងភ្នំបូកគោ។ 

4. ដំណាក់ស្លាខ្មៅ

ដំណាក់ស្លាខ្មៅ ​ត្រូវ​បាន​សាងសង់​ឡើង​ពី​ថ្ម និងបិទ​ដោយ​ឈើ​ស្លា​ខ្មៅ​នៅ​ក្នុង​ឆ្នាំ1936។ សព្វថ្ងៃ ដំណាក់មួយនេះបានក្លាយទៅជាអគារចំណាស់មួយដែលគេនិយមទៅបោះតង់។ 

5. ដំណាក់ព្រះមុនីវង្ស​ ឬ ដំណាក់ស្ដេច

ដំណាក់ព្រះមុនីវង្ស​ ឬ ដំណាក់ស្ដេច គឺជាសំណង់អាគារដ៏មានវ័យចំណាស់ ដែលបន្សល់ទុកពីសម័យអាណានិគមនិយមបារាំង។ កាលពីមុន ទីនេះជាព្រះរាជដំណាក់របស់ព្រះបាទមុនីវង្ស សម្រាប់សម្រាកកម្សាន្តពីអាកាសធាតុក្តៅនារាជធានីភ្នំពេញ។ 

6. រូបបដិមាលោកយាយម៉ៅ

រូបបដិមានេះ ត្រូវបានសាងសង់ឡើងនៅឆ្នាំ 2010 មានកម្ពស់សរុប 29 ម៉ែត្រ ជាទីកន្លែងដែលប្រជាជនខ្មែរតែងតែគោរពបូជាដោយទៀន ធូប ផ្កា និងផ្លែឈើជាដើម។ 

7. បឹងលើភ្នំបូកគោ

ជាបឹងមួយកន្លែងដែលមានចម្ងាយប្រមាណ ៥គីឡូម៉ែត្រពីរមណីយដ្ឋានឋានសួគ៌បូកគោ។ បឹងមួយនេះអាចផ្ទុកទឹកបានចំនួនកន្លះលានម៉ែត្រគូប។ ចំណុចពិសេសនៅទីនេះគឺមានអាកាសធាតុត្រជាក់ ជាទីកន្លែងដ៏ពេញនិយមសម្រាប់ភ្ញៀវទេសចរដែលចូលចិត្តបោះតង់។
 

8. វាលស្រែ 100

វាលស្រែ 100 សម្បូរដោយផ្ទាំង​ថ្ម​ដែល​ដុះ​រដិបរដុប​ខណ្ឌ​ចែក​វាលស្មៅ​ដ៏​ធំ​ល្វឹងល្វើយ និងជាកន្លែងដែលគេចូលចិត្តទៅលេង និងផ្គុំដុំថ្មជាការកម្សាន្ត។

9. វាលស្រែ 500 (ផ្កាបំពង់ក្រឡោម)

ជាទីកន្លែងមួយដែលសម្បូរដោយផ្កាបំពង់ក្រឡោម មានរូបរាងប្លែកៗ ជាទីទាក់ចិត្តភ្ញៀវទេសចរដែលមកលេង។
 

10. ទឹកជ្រោះពពកវិល

ទឹកជ្រោះពពកវិល គឺជាទឹកជ្រោះមួយកន្លែងដែលស្ថិតនៅលើភ្នំបូកគោ មានទឹកធ្លាក់ជាដំណាក់ៗ សម្បូរដោយផ្ទាំងថ្មធំៗ និងមានអាហារដ្ឋាននៅទីនេះផងដែរ។
 

11. ថ្មមុខយក្ស

ថ្មមុខយក្ស គឺជាទីតាំងមួយកន្លែងដែលស្ថិតនៅតាមផ្លូវឡើងទៅលើកំពូលភ្នំ។ ផ្ទាំងថ្មនេះមានរូបរាងស្រដៀងទៅនឹងមុខយក្ស។ ភ្ញៀវទេសចរជាច្រើនចូលចិត្តឈប់នៅទីនោះដើម្បីមើលទិដ្ឋភាពនៃក្រុងកំពតទាំងមូល។

12. ច្រកទ្វារឋានសួគ៌

បើជិះពីវាលស្រែ៥០០ ចម្ងាយប្រមាណ ៨គីឡូម៉ែត្រទៅ គឺនៅខាងស្តាំដៃយើងនឹងឃើញមានផ្លាកដែលបង្ហាញផ្លូវចូលច្រកទ្វារឋានសួគ៌។ នៅទីនោះមានថ្មពីរផ្ទាំងធំៗប្រៀបដូចជាក្លោងទ្វារដ៏អស្ចារ្យ។

13. ចំការស្រ្តបឺរី

ក្រៅពីសំណង់អគារចាស់ៗ និងធម្មជាតិដ៏ស្រស់បំព្រង នៅលើភ្នំបូកគោក៏មានចំការស្រ្តបឺរី ដែលអ្នកទាំងអស់គ្នាគួរតែទៅទស្សនាផងដែរ។ គេអាចដាំស្រ្តបឺរីនេះបានដោយសារតែនៅលើភ្នំមានអាកាសធាតុត្រជាក់ អំណោយផល គួបផ្សំនឹងបច្ចេកទេសនៃការដាំដុះ និងថែទាំ ទើបយើងអាចឃើញវត្តមាននៃដំណាំនេះបាន។

អត្ថបទដោយ៖ ឡុង ថុនី