ពេលខ្លះមកលេងកំពត យប់ឡើងមិនដឹងទៅណាមែនទេ? មកស្គាល់កន្លែងកម្សាន្តទាំង ៩នេះ ដែលអ្នកអាចចំណាយពេលវេលាដ៏រីករាយនាពេលរាត្រីសម្រាប់ដំណើរកម្សាន្តរបស់អ្នកទាំងអស់គ្នា។ 

1. មាត់ព្រែកកំពត

មាត់ព្រែកកំពត គឺជាកន្លែងលំហែកាយដ៏ពេញនិយមមួយដែលបច្ចុប្បន្នមានប្រវែងប្រហែលជិត ៦គីឡូម៉ែត្រ រាប់ចាប់ពីខាងត្បូងស្ពានដែករហូតដល់ឆ្នេរកោះស្មៅ។ មនុស្សម្នាជាច្រើនចូលចិត្តទៅលេងនៅទីនេះ ដោយសារតែបរិយាកាសល្អ ទេសភាពស្អាត និងខ្យល់ដ៏ត្រជាក់។

2. ឆ្នេរកោះស្មៅ

ឆ្នេរកោះស្មៅ គឺជាឆ្នេរកម្សាន្តប្រវែងជាង ២គីឡូម៉ែត្រ លាតសន្ធឹងនៅតាមបណ្តោយមាត់ព្រែកកំពត អមដោយដើមស្ងាវដុះជាជួរតម្រៀបគ្នាគួរអោយចង់គយគន់ ជាពិសេសមានកន្លែងលក់អាហារឆ្ងាញ់ៗតាមដងផ្លូវនៅតំបន់នោះផងដែរ។ 

3. ផ្សាររាត្រីកំពត

ក្រៅពីឆ្នេរ អ្នកទាំងអស់គ្នាក៏អាចដើរលេងកម្សាន្ត ទិញសម្លៀកបំពាក់ និងឥវ៉ាន់នៅ ផ្សាររាត្រីកំពត ផងដែរ។ ផ្សារនេះមានទីតាំងស្ថិតនៅចំកណ្តាលក្រុងកំពត ក្បែររង្វង់មូលទុរេនតែម្តង។ 

4. ផ្សារក្រណាត់ចាស់

ផ្សារក្រណាត់ចាស់ គឺជាសំណង់អគារដែលបន្សល់ទុកតាំងពីសម័យអាណានិគមបារាំងមកម្លេ៉ះ។ បច្ចុប្បន្នផ្សារនេះបានក្លាយទៅជាតំបន់កម្សាន្តពេលរាត្រីដែលសម្បូរដោយភោជនីយដ្ឋានបរទេស ម៉ាតលក់ទំនិញ និងស្តង់លក់អាហារសម្រន់​ជាច្រើនមុខ មានរសជាតិឈ្ងុយឆ្ងាញ់ និងតម្លៃសមរម្យ។

ទីតាំង៖ https://maps.app.goo.gl/edE1kpEuGTBPMYzT7

5. រង្វង់មូលទុរេន

រង្វង់មូលទុរេន គឺជារង្វង់មូលដែលតំណាងអោយខេត្តកំពត។ ភ្ញៀវទេសចរដែលមកលេងកំពត ភាគច្រើនចូលចិត្តមកថតរូបនៅទីនេះ។

6. តាមដងផ្លូវរោងកុន​ 7មករា

បើយើងធ្វើដំណើរចេញពីរង្វង់មូលទុរេនឆ្ពោះទៅកាន់ស្ពានឥន្ធនូ យើងនឹងបានឆ្លងកាត់ដងផ្លូវមួយដែលសម្បូរដោយអាហារសម្រន់ជាច្រើនប្រភេទ។ ផ្លូវនេះតែងតែមានចរាចរណ៍កុះករ​ មិនសូវដាច់ ព្រោះជាតំបន់ដែលយើងអាចរកអាហារញុំាបានចាប់ពីពេលល្ងាចរហូតដល់យប់ជ្រៅ។

ទីតាំង៖ https://maps.app.goo.gl/yXDmVp5oAbZRtnce8

7. ស្រះឈូក

ស្រះទឹកនេះគឺជាអតីតប្រភពទឹកស្អាតសម្រាប់ប្រជាជននៅតំបន់នេះប្រើប្រាស់ប្រចាំថ្ងៃកាលពីជំនាន់មុន។ បច្ចុប្បន្ន ស្រះទឹកនេះបានក្លាយទៅជារមណីយដ្ឋានទេសចរណ៍ដ៏ស្រស់ត្រកាល បន្ទាប់ពីមានការអភិវឌ្ឍន៍ពីអាជ្ញាធរ។ ជារៀងរាល់ល្ងាច គេឃើញមានមនុស្សម្នាជាច្រើន ខ្លះអង្គុយលំហែកាយ ខ្លះដើរហាត់ប្រាណ ខ្លះទៀតលេងកីឡាផ្សេងៗនៅទីនេះ។

8. តំបន់ស្រាក្រឡុក

ក្រៅពីកន្លែងលំហែកាយ នៅកំពតក៏សម្បូរដោយហាងស្រាក្រឡុកផងដែរ។ អ្នកដែលចូលចិត្តស្រាក្រឡុក អាចមកកាន់ តំបន់ស្រាក្រឡុក របស់ខេត្តកំពតដែលមានទីតាំងស្ថិតនៅតាមបណ្តោយមាត់ព្រែកកំពត ម្តុំរូបសំណាក់ព្រះបាទអង្គឌួង។ 

ទីតាំង៖ https://maps.app.goo.gl/4RDj5weGfsHF7Amo9

9. Club កម្សាន្ត

សម្រាប់ខេត្តកំពតមិនសូវជាសម្បូរក្លឹបប៉ុន្មានទេ តែអ្នកទាំងអស់គ្នាអាចមកកាន់ Temple Club បានដែលជា Club កម្សាន្តដ៏ពេញនិយមមួយក្នុងខេត្តកំពត ទីតាំងស្ថិតនៅតាមបណ្តោយផ្លូវទៅរមណីយដ្ឋានទឹកឈូ។

អត្ថបទដោយ៖ ឡុង ថុនី