សហគមន៍នេសាទត្រពាំងសង្កែខេត្តកំពត

អំពី

សេវាកម្ម

ទំនាក់ទំនង

ចំណុចសំខាន់

រូបភាព

04/07/2020

សហគមន៍នេសាទត្រពាំងសង្កែខេត្តកំពត គឺជាសហគមន៍ទេសចរណ៍ដ៏មានភាពទាក់ទាញមួយកន្លែង ដែលមានទីតាំងស្ថិតនៅភូមិកំពង់កែស ឃុំត្រពាំងសង្កែ ស្រុកទឹកឈូ ខេត្តកំពត ចម្ងាយ ៧គីឡូម៉ែត្រពីរង្វង់មូលទុរេន។

ព្រៃកោងកាងនៅទីនោះមានទំហំសរុប ៤៨ហិចតា ដុះលាតសន្ធឹងតាមបណ្តោយព្រែកក្បាលរមាសរហូតដល់ដៃសមុទ្រ។ ជាមួយគ្នានេះដែរ ខាងសហគមន៍ក៏មានជាផ្ទះបឹងហ្គាឡូ អាហារដ្ឋាន ទូកទេសចរណ៍ និងថ្នាលបណ្តុះកូនកោងកាងទុករួចជាស្រេចផងដែរ។

សម្រាប់សកម្មភាពកម្សាន្តវិញ ភ្ញៀវទេសចរអាចជួលទូកជិះកម្សាន្ត ចុះដាំដើមកោងកាង ស្វែងយល់ពីជីវៈចម្រុះក្នុងព្រៃលិចទឹក ដើរលើស្ពានឈើ មើលទេសភាពថ្ងៃលិច ថតរូបលេង ស្រូបខ្យល់អាកាសដ៏បរិសុទ្ធ ផឹកកាហ្វេ បរិភោគអាហារបែបជនបទ ភ្លក់អាហារសម្រន់ ស្នាក់ក្នុងផ្ទះបឹងហ្គាឡូ រឺចង់បោះតង់គេងក៏បានដែរ។

ដើម្បីទៅកាន់ទីនេះ ភ្ញៀវទេសចរអាចធ្វើដំណើរចេញពីទីរួមខេត្តកំពតតាមបណ្ដោយផ្លូវជាតិលេខ ៣៣ ឆ្ពោះទៅកាន់ខេត្តកែបចម្ងាយប្រហែល ៧គីឡូម៉ែត្រ រួចបត់ស្តាំតាមផ្លូវបេតុងតូចមួយដែលមានផ្លាកឈ្មោះសម្គាល់។ រួចបន្តដំណើរប្រហែល ៥០០ម៉ែត្រទៀត នឹងបានទៅដល់ទីតាំងតែម្តង។

អត្ថបទដោយ៖ ដែង សុជាតា