10.1K រមណីយដ្ឋានទំនប់ប្រទាក់ក្រឡា
ទំនប់ប្រទាក់ក្រឡា ត្រូវបានកសាងឡើងក្នុងសម័យខ្មែរក្រហម ក្រោមការកៀរគរប្រជាជនឲ្យទៅជនបទ ដោយអំណាចផ្តាច់ការគៀបសង្កត់ប្រជារាស្រ្ត និងសម្លាប់យ៉ាងរង្គាល ។ ព្រោះតែស្ថានភាពដល់ដំណាក់កាលទ្រុឌទ្រោមខ្លាំង នាអំឡុងខែកញ្ញា ឆ្នាំ ២០០៧ ទំនប់នោះក៏ត្រូវបានបាក់ធ្លាយដោយសារកម្លាំងទឹកបុករុលខ្លាំង។ ក្រោយមក ក្រសួងធនធានទឹកបានស្ថាបនាទំនប់បង្ហូរទឹកមួយខ្សែត្រង់ចំណុចចន្លោះភ្នំដើម្បីបង្ការការបាក់ធ្លាយដោយសារបរិមាណលើសពីការផ្ទុកទើបធ្វើឲ្យទីនោះប្រែក្លាយជាកន្លែងលំហែកម្សាន្តដ៏ស្រស់ស្រាយបែបធម្មជាតិ និងទាក់ទាញបំផុត។
ទីនោះពិតជាមានសារ:ប្រយោជន៍ខ្លាំងណាស់ចំពោះប្រជាកសិករក្នុងស្រុកសម្រាប់វិស័យកសិកម្ម។ ទឹកក្នុងទំនប់នេះគឺមានគ្រប់រដូវទាំងប្រាំង និងវស្សា។ ដោយកម្រិតអតិបរមាអាចផ្ទុកបានទឹកប្រមាណប្រហែលដប់លានម៉ែត្រត្រីគុណ។ ក្រៅពីបម្រើឲ្យការធ្វើស្រូវប្រាំងវស្សា ទឹកទំនប់នេះក៏បានជួយដល់កសិករក្នុងការដាំដំណាំគ្រប់ប្រភេទចាប់ពីបន្លែ ដំណាំរួមផ្សំរហូតដល់ ម្រេច ទុរេន ព្រមទាំងការចិញ្ចឹមសត្វទៀតផង។
មុននឹងមកដល់មណ្ឌលកម្សាន្តទំនប់ប្រទាក់ក្រឡា ភ្ញៀវទាំងអស់ក៏អាចគយគន់រាល់សកម្មភាព ជីវភាពរស់នៅរបស់ប្រជាកសិករជាមួយស្រែស្រូវ ចម្ការដំណាំដែលមានពណ៌ខៀវស្រស់បំព្រង។ ដោយសារតែកន្លែងនោះស្ថិតក្នុងទីតាំងដែលហ៊ុមព័ទ្ធដោយជួរភ្នំ ទើបទំនប់ប្រទាក់ក្រឡាបានប្រែក្លាយជាទីកន្លែងដែលអំណោយផលដ៏ល្អសម្រាប់ផ្នែកមួយនៃវិស័យទេសចរណ៍។ ទីតាំងទំនប់ប្រទាក់ក្រឡាស្ថិតក្នុងទឹកដី ភូមិបុស្សញ៉ិញ ឃុំកូនសត្វ ស្រុកទឹកឈូ ភាគខាងកើតនៃទីរួមខេត្តកំពត ដោយបែកចេញពីផ្លូវជាតិលេខ៣៣ ចុះតាមផ្លូវអភិវឌ្ឃន៍ត្រង់ចំណុចខ្លោងទ្វារសាលាស្រុកទឹកឈូ។
