12.2K ឧទ្យានដងព្រែក
នៅទីនេះអ្នកមានឱកាសដ៏វិសេសវិសាលមួយក្នុងការធ្វើការសាកល្បងជិះខ្សែរ៉កឆ្លងកាត់ព្រែកយ៉ាងសប្បាយរីករាយ និងប្រកបដោយសុវត្ថិភាពដោយមិនចាំបាច់ចំណាយលុយច្រើនទេ។ បទពិសោធន៍នៃការកំសាន្តនេះត្រូវចំណាយតែ៣០០០០រៀលប៉ុណ្ណោះ ដែលក្នុងនោះមានបញ្ចូលរួចជាស្រេចនូវថ្លៃសម្រាប់បរិក្ខារសុវត្ថិភាព និងសេចក្តីណែនាំ ការដើរឡើងជណ្តើររាងគូទខ្យងធ្វើអំពីដើមឫស្សីទៅកាន់ធ្នើរនៅចុងឈើសម្រាប់ឡើងជិះខ្សែរ៉កកាត់ទទឹងព្រែកកំពត ហើយអុំទូកកាយ៉ាក់កាត់ព្រែកត្រលប់មកវិញយ៉ាងសប្បាយរីករាយ។
សរុបមកវិញ សកម្មភាពកំសាន្តទាំងអស់រួមមាន ការជិះខ្សែរ៉ក ការលោតចុះពីទីខ្ពស់ដោយចងខ្សែពួរនៅនឹងកជើង ពោងរអិលបណ្តែតលើទឹក កាយ៉ាក់ ទូកធាក់នឹងជើង ល្បែងក្នុងទឹក។ កន្លែងនេះមានសមត្ថភាពទទួលបានមនុស្ស ២០០០នាក់ ហើយបើកជារៀងរាល់ថ្ងៃចាប់ពីម៉ោង៩ព្រឹក ដល់ម៉ោង៦ល្ងាច។ ឧទ្យានដងព្រែកមានទីតាំងស្ថិតនៅតាមបណ្តោយផ្លូវទៅទឹកឈូ ក្នុងភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ចម្ងាយប្រហែល៧គ.ម ពីទីរួមខេត្ត។
